URIM PËR FTERRËN DHE FTERRIOTËT E MREKULLUESHËM

VJOLLCA TROKSI (MATO) nga Italia:

Jam një nënë e moshuar me origjinë nga Fterra. Jetoj në Itali te djali im i vetëm, por kthehem shpesh në Shqipëri, sepse këtu kam rrënjët e shpirtit tim. Në Itali djali më ka hapur gazetën "Fterra jonë" në internet dhe kam parë në televizionin shqiptar dokumentarin për Fterrën. Më është bërë zemra mal që fshati i bukur i babait tim dhe fteriotët po bëjnë emër të madh jo vetëm në Shqipëri, po edhe kudo në botë. Më thotë zemra se nuk duhet të vdes pa shkuar edhe një here në Ferrën tonë të dashur, sidomos tani që do bëhet edhe rruga. Vëllai im, Vullneti, më ka folur për “parlamentin” e Fterrës dhe për intelektualët fteriotë të Tiranës, që mblidhen si vëllezër për të qenë të bashkuar e për të rritur lavdinë e fshatit tonë me mjetet që ka kjo kohë e re.

E mbushur me gëzim për të gjitha sa shoh e dëgjoj, meqë po afron festa e Vitit të Ri, dëshiroj me gjithë zemër të bëj një urim për Fterrën dhe fteriotët e mrekullueshëm të saj. Për “parlamentin” e burrave të mençur që nderojnë fshatin dhe për gazetën "Fterra jonë" e cila është jo vetëm një dritare që hap qiellin të shohim në largësi vendin dhe njerëzit, po edhe një ekran me fotografi dhe pamje të gjalla të jetës së fteriotëve.

Të rroni sa malet e Fterrës dhe paçi gjithmonë gëzim e frymëzim për punë të mira.

AJET RUKA nga SHBA, shkruan:

Së pari gëzohem për rifillimin e botimit të gazetës "Fterra jonë". Ajo na mban afër njëri tjetrit, afër Fterrës tonë të dashur. Faleminderit Juve, Muzaferit, Bardhylit dhe bashkëpunëtorëve të tjerë.

Me këtë rast dua të uroj dy akademikët e rinj të Fterrës, Besim Elezin dhe Muzafer Korkutin, dy personalitete të shquara në fushat e mjekësisë dhe të arkeologjisë. Ju uroj atyre  shëndet, suksese në veprimtarinë a tyre shkencore dhe jetë të gjatë.

Ju uroj gjithë bashkëfshatarëve të mi Gëzuar festat.

Me erdhi shumë keq për vdekjen para kohe të shokut tim të klasës Durro Hizmo dhe të Imer Shkurtit, Ju shpreh ngushëllimet e mia familjeve të tyre për humbjen e njerëzve të tyre të dashur.

Ju përqafoj me mall,  

Nga Saranda: Baki Gjoni, Gjykim Dauti, Robert Maçi dhe Asllan Brinja urojnë me rastin e festave të fundvitit të gjithë komunitetin fteriot kudo që ndodhen: Shëndet mbarësi dhe harmoni në familjet e tyre. Urojmë gjithashtu botuesit dhe stafin e gazetës ''FTERRA jone'' për misionin fisnik që kryejnë për botimin e kësaj gazete

Nga Fterra: Ju urojmë GËZUAR VITIN E RI 2009 të gjithë fteriotëve, miqve e dashamirësve për çdo emër, paçi gjithmonë gëzime jetë të gjatë e të shëndetshme.

Në veçanti urojmë veteranët e luftës e të punës, profesorët e teknikët, pensionistë e moshatarë, brezat që janë në punë e ata që rritin fëmijë, nxënës e student, shkrimtarë e artistë, grupin polifonik e sidomos botuesit, bordin, bashkëpunëtorët, sponsorizuesit e gazetës “Fterra jonë”, që bën të mundur që urimet të arrijnë në çdo zemër fteriote, në çdo skaj brenda e jashtë Shqipërisë.

Profit Zani, Hasan Mehmeti, Novruz Malo, Astrit Avreci, Arben Dhuli