HUMOR NGA FTERRA

Edhe Boshit tanët janë...

Në votimet e para që u bënë pas çlirimit përdoreshin dy kuti votimi, njëra ishte e Frontit dhe quhej “plot”, tjetra që ishte kundra,  quhej “bosh”. Çdo votues merrte nga komisioni i qendrës së votimit një kokërr të vogël llastiku dhe duhet të fuste dorën në të dy kutitë dhe sigurisht që kokrrën e llastikut duhet ta lëshonte në kutinë e frontit, pra, në kutinë “plot”. Një grua e moshuar nuk e kuptoi mirë këtë mënyrë votimi, dhe e hodhi kokrrën në kutinë “bosh”.

-Ç’na bëre, i thotë anëtari i komisionit, ti e hodhe votën në kutinë boshe

E moshuara që kutinë boshe e kishte kuptuar si kuti të Borshit, (se në të folmen fteriote në vend të emrit Borsh, përdorej Bosh), ju përgjigj:

-S’ka gjë a të keqen, edhe Boshit tanët janë.

J J J

Kush të mos vijë në mbledhje, ju shoftë dera me ujë...

Gjatë kohës së luftës në Fterrë bëheshin shpesh herë mbledhje të popullit për probleme të ndryshme e sidomos kur vinte ndonjë i deleguar. Sipas rregullit që ishte vendosur nga këshilli i fshatit, në mbledhjen duhet të merrnin pjesë jo më pak se një person për familje (një për dere – siç i thoshin në Fterrë). Azis Mehmeti ishte i ngarkuar për të bërë lajmërimin e popullit. Dhe kur kishte raste te tilla, ai dilte e fliste me zë të lartë që të dëgjonte i gjithë fshati:

    “Sonte kemi një mbledhje me rëndësi, prandaj të vijë nga një për dere. Kush të mos vijë, ju shoftë dera me ujë”.

J J J

Zoti mos na lëntë pa dhëndurë e pa kafshë dore...

Në një dasmë në Fterrë, një dhëndër fteriot që nuk ishte nga Fterra, ju qep të dehte me raki Feim Dautin por ky ishte i fortë dhe i rezistoi deri sa dhëndëri u deh për vete e ra për tokë. Atëherë Feimi tha atë shprehjen e famshme që përmendet gjithmonë në Fterrë dhe nga fteriotët:

        “Zoti mos na lëntë pa dhëndurë dhe pa kafshë dore.

J J J

Si mjerë ajo nuse që do të pëlqejë...

Liro Gjonika ka pesë djem e pesë nuse e plot nipër e mbesa. Një ditë e merr në telefon Meli, e shoqja e Feksorit dhe i thotë: “Po ku je moj mama, se të kërkojmë” Lirua u përgjigj me humor: “Kam dalë nëpër nuse, cila të më pëlqejë, atje do të qëndroj”.  Dhe Meli, po me humor ju përgjigj: “Si mjerë ajo nuse që do të pëlqejë”.

J J J

Nuk jam vetëm, jam me Paskalin...

Një rast tjetër: Feksori e kërkon Liron në telefon në Fterrë. Lirua hap celularin dhe në këtë kohë Feksorin në telefon dëgjoi disa zëra, për momentin të panjohur, dhe i thotë: “Si je moj mama, vetëm je?” Dhe Lirua i përgjigjet: “Jo a të keqen, nuk jam vetëm, jam me Paskal Milon” . Dhe Lirua i tha të vërtetën, në momentin që mori në telefon Feksori e dëgjoi edhe zëra të tjerë, Lirua në televizor po shikonte e dëgjonte një intervistë të Paskal Milos.

J J J